講番股市，恒指周二跌破3月29日低位20250的小雙頂頸線，昨雖微升29點至20206，但仍在頸線之下，小心後市朝小雙頂量度跌幅目標19628進發。我就繼續喺績優股中尋寶，雖然我係好息之徒，但揀股唔係齋睇派息，仲要睇營運數據，近日心水係九龍建業（034）。
九建從事地產投資、發展及物業管理，業務遍及中港澳，老闆係人稱「澳門李嘉誠」嘅柯為湘。早前公佈2015年度業績，營業額按年增加27%，純利增長16%；扣除投資物業重估收益，基礎純利增長4%。過去3年，每股盈利分別為1.12元、0.9元、1.04元，每股派息為0.57元、0.57元、0.58元，派息比率達51%、63%、56%，對得住捧場客。
九建土地儲備豐厚，年初又向控股股東保利達控股收購將軍澳地皮，料將帶來可觀利潤，繼續支持派高息。該股近日表現強勢，只要市況配合，有望展開新一輪升浪。現價7.12元，市盈率6.9倍，股息率8.1厘，高過晒以高息見稱嘅內銀股，可候低吸納。
內銀嘅高息係糖衣毒藥，若揸到滿手貨，就宜減持。據講，擺明搵內銀笨嘅債轉股方案，最快本月推出，首批規模1萬億元人民幣，工行（1398）、中行（3988）、招行（3968）等做白老鼠。
明日又到Happy Friday，兼且七人欖球賽開鑼！滙豐研究部曾經用佢哋嘅龐大資料庫分析，發現七人欖球賽果同港股有些少關係，就係太平洋島國薩摩亞（Samoa）贏嗰年，恒指就會升，2007年、2010年都係咁，今年梗係望佢贏啦！
割柑人
本欄逢周四刊出