鄭希怡(Yumiko)嘅囡囡梁浸浸喺網上一直人氣高企，呢個真係要多得佢阿媽Yumiko無私嘅分享，搞到大家好似一直陪住佢成長！唔經唔覺，梁浸浸已經2歲半，喺Yumiko嘅悉心照顧吓，慢慢滲出一陣少女味，Yumiko仲話囡囡0依家好鬼貪靚，成日都偷偷地拎佢支唇膏嚟搽。

之不過話晒梁浸浸年紀仲係好細，暫時都唔可以孖住媽咪去shopping，於是乎呢個重任暫時都係交俾老公梁學儲(Andy)相伴。日前夜晚8點幾，Yumiko單拖揸住嗰架70幾萬嘅電動新車Tesla，一個人去中環歌賦街嘅Homeless睇傢具，不過Yumiko主攻嘅傢具當然係同梁浸浸有關喇！

Yumiko一直對擺喺門口嗰張屋型床好有興趣，見佢同個店員喺度密密斟，過咗大約10分鐘左右，老公Andy同埋一男一女友人去咗嗰間舖頭，大家都似乎鍾情呢張床，逗留咗冇耐，Andy先陪朋友離開，跟住再返去會合Yumiko。佢哋兩個繼續主攻呢張屋型床，行咗入去舖頭最角落一齊研究，其間Yumiko行出嚟，拎住部電話影張床，再喺wechat同人密密斟，睇怕係叫啲朋友俾吓意見！

咁老公Andy又喺度做乜呢？梗係全程交晒俾老婆決定，不過佢都有行嚟行去，望吓張床啲間格兼俾吓意見，結果睇到咁下上，佢哋似乎決定買呢張3萬幾蚊嘅屋型床俾囡囡！冇耐Yumiko發現有記者喺度影相，不過一啲都冇影響心情，Yumiko笑笑口同記者打個招呼之後，繼續專心買嘢，今次佢主攻熊啤啤嘅小擺設同用品，大約揀多半個鐘左右，佢哋揸車離開！唔知梁浸浸見到呢張床，會唔會唔肯落床呢？