今年繼續由滙豐(005)勇奪最高籌款機構大獎,為公益金籌到接近900萬元,獅子銀行已經係連續第8年奪得呢項榮譽,唔係講笑;至於第二名就超人李嘉誠旗下嘅長實(001)奪得;第三、四、五名分別係彩星集團(635)、新鴻基地產(016)同何鴻燊。話市民喺股市賺到所以捐多咗錢,唔係華華老作㗎。
嗱,就因為港股暢旺,好多大陸企業嚟香港上市,中國人就梗係想好意頭,於是有成46家公司,分別捐50萬甚至100萬銀畀公益金,攞番個靚靚上市冧巴。就喺咁公益金就袋咗4150萬銀。
仲有,國泰航空(293)為咗慶祝成功收購港龍,捐咗總值1008萬元嘅中航興業股份,捐得咁豪又咁有意義,所以公益金都禮尚往來,頒咗個慈善家大獎畀佢。