【醫生唔准唱歌】Joe Junior出院精神晒 赴美探母靜休兩個月
美國通波仔Joe Junior
張堅庭同太太楊諾思、楊玳詩、鄭丹瑞及太太,張達明,同埋Joe Junior今晚喺銅鑼灣出席「貧窮富爸爸」慈善放映會。
早前Joe Junior心臟有事,要入院通波仔(新聞連結: http://bit.ly/2sGWiSd ),今晚見佢精神唔錯,仲同老婆一齊出席放映會,佢話:「醫生話休息唔夠,食得唔健康嘢太多,又捱得辛苦,心臟有少少毛病,通咗波仔,呢兩三個月,同老婆一齊去旅行,趁機休息。」Joe鍾意唱歌,但醫生就建議要停一停:「醫生叫我休息兩三個月先,之後會投入工作,再唱番歌,趁放假去美國探媽咪,因為佢好擔心,等佢見下我,知我冇事。」
此外,同場嘅楊諾思希望趁住父親節做善事,幫一個機構籌款,嚟緊兩公婆會同爸爸楊受成食飯慶祝,佢話:「仔唔係香港,遲啲再同仔女食飯。」張堅庭講到貧窮富爸爸,佢話:「自己屋企生活富裕嘅時候,教小朋友點樣珍惜,現有生活、食物、資源同慳錢。」
另張達明最近執導舞台劇《塵上不囂》,之前公映16場都爆滿,佢話:「希望之後會再做第二輪演出,自己有唔同構思,加入第二輪,希望呢個舞台劇可以巡迴演出,北京、上海都有人睇廣東話演出。」達明仲想將呢套舞台劇拍成電影,問過志偉意見,都舉腳贊成。