鄭秀文（Sammi）今日喺銅鑼灣出席「Believe in Mi簽名會」，Sammi現場為500歌迷簽名，又同fans玩遊戲，幾位fans o氹得Sammi勁開心，佢仲現場即興唱咗首《千年如一日》送畀歌迷。新碟銷量連續3星期冠軍，Sammi話好開心，仲希望衝向4星期冠軍，佢話：「好多人認為廣東歌市場好細，不被重視，凡事都要正面角度同方式，希望喺萎縮嘅市場大利好消息。希望公司繼續畀我哋做有質素嘅作品。」

今次新碟封面泳衣配西裝褸上陣，問Sammi若衝出4連冠會唔會着泳衣答謝歌迷？佢笑話：「呢件一件頭冇難度，三點色就有難度喇，不過可以影到唔似，我對身形滿意，健美嘅話三點色同六點色都冇所謂。如果係嘅話請公司同事食飯啦。」而講到今次咁性感，Sammi話老公許志安都話好睇，但就唔會刻意走性感，Sammi自豪話：「性感唔係我走開嘅路線，我46歲，展露線條，靠運動有健美身段，所以女士們唔好放棄，健康要有健康生活、飲食同精神狀態，我自己唔在乎肥定瘦。」

Sammi透露10月初會去釜山電影節，宣傳關錦鵬嘅新戲《八個女人一台戲》，佢話：「我對上一次去釜山係10幾年前，係宣傳《長恨歌》，當時身體狀況係奄奄一息，今次去會有好多感觸，再拍阿關，好有信心，用輕鬆心情去，最緊要keep好fit先，依家都好滿意，但身心健康緊要，好開心今次半工作半玩。」

精選娛聞，喺晒《娛果》
http://fb.com/appledailyent