有律師唔做，走去教英文嘅林作，向來都搞作多多，嚟緊書展又出書。早排佢上大陸，參加真人騷節目《一站到底》，同人哋鬥智之外，日前佢又喺fb留言，公開話徵女友，咁麥明詩呢？

日前林作喺fb公開徵女友，佢仲寫明話︰「公開誠徵女朋友。由於智商高的原因，我目前很難搵到喜歡嘅女仔。由於漸覺生活無趣，現特別公開誠徵女朋友。參加者只需要與一張我的照片合照，然後發給我，即可參加。請給我一個家。」

《蘋果》今日問番林作點解要網上搵女友？佢電話回覆話︰「喺我阿媽長年累月壓力，唔想自己再單丁一條友，我啲朋友個個都有桃花，係自己淒慘少少，所以想組織個家庭，唔只係徵女友，係徵婚。」至於女友要具備咩條件？佢話︰「以前好膚淺要美貌與智慧並重，（前度麥明詩？）o依家有美貌就得，唔使智慧。（因為前度太叻太有智慧？）人哋我唔方便評論。」見佢經常去gathering，都識唔到女仔？佢話︰「冇乜合心水，啱嘅都畀人搶晒，之前我上日文堂，有個女仔幾好，有次喺餐廳遇到佢，同佢暢飲咗一輪，跟住我收到個message，個朋友叫我唔好搞佢細佬嗰女朋友，即係叫我收皮。」問佢媽咪冇介紹女仔認識？佢笑謂︰「我阿媽不嬲都催我，但佢啲taste好差，所以我要快啲有人同我結婚，塞住佢把口。」

至於父親節當日播出嗰集《一站到底》，佢喺阿媽面前被out跌落窿，佢話︰「我阿媽冇擔心我，佢好欣賞我仲翻睇咗兩次，個窿都超過1米高好安全，其實我入咗名人堂，之後仲會返去再比賽。」

精選娛聞，喺晒《娛果》
http://fb.com/appledailyent