今屆洲際盃今晚開始，雖然巴西冇份參戰，不過貴為球王，巴西名宿比利仍然獲贊助商邀請到俄羅斯做嘉賓，仲會入場睇俄羅斯對新西蘭嘅揭幕戰，除咗比利，連阿根廷球王馬勒當拿都會出席添。

有記者就問比利下年世界盃睇好邊隊，比利當然力撐祖國巴西入決賽，仲話俄羅斯會係另一支入決賽對手添；不過咁，比利出晒名係烏鴉口，得到球王祝福，巴西同俄羅斯兩軍都唔知好嬲定好笑。