【本報訊】「𠵱家諗起都覺得心寒，好恐怖！隊友都好不安。」有中青籃球隊隊員昨日接獲警方電話，才驚悉隊中「三分王」、花名叫「阿水」的姓莫隊員，竟是空姐屍藏衣櫃案女死者的前度男友，並是警方的目標追查人物。上周四晚有份練波的一班隊友，昨日在兇案見報後即於WhatsApp群組內議論紛紛，有人話阿水當晚身穿便裝到球場，並無落場打波，事後想起亦覺得奇怪，當時阿水表現冷靜，更笑稱唔打波都會夾錢畀場租。
隊友透露，阿水中學時已加入「中青」，擅長射三分球，是隊中主力射手。「大家識咗成10年，阿水平日打波同行為都唔覺有暴力，隊友對於佢涉及兇案都感到愕然，亦唔敢相信」。阿水於今年9月曾因毆打女友罪成被判守行為一年，隊友亦一直不知道：「我哋都係睇報紙先知，真是估唔到，個心亦好唔舒服。」