周星馳發掘嘅星女郎張雨綺，事業雖未見彈起，但感情生活卻多姿多采，佢同富豪男友汪小菲愛得癡纏，佢哋大前晚先拍拖喺上海出席Bazaar明星慈善夜，汪小菲出手闊綽，豪捐50萬人民幣行善，令張雨綺有晒面子。

情不自禁攬到實

估唔到張雨綺同男友真係愛到少一分鐘冇咗對方都唔得，張雨綺前日被發現獨自坐夜機返北京，打扮低調兼素顏嘅佢，佢邊講手機邊拖住行李篋急步出閘，原來張雨綺正遙控搵男友，當佢見到情郎，張雨綺嘅右手仲做緊「篋神」，左手已經肉緊攬住嚟接機嘅honey，二人小別勝新婚，情不自禁喺接機大堂上演一幕火辣咀嘴，汪小菲係咁狼吻女友，果然錫到佢燶。
熱吻一輪，佢哋依然大做連體嬰，其後二人蹺到實一齊去咗停車場攞車，打道回府。身為太子爺嘅汪小菲並冇假手要司機揸車，免得破壞二人世界，寧願親自做女友嘅柴可夫，足見張雨綺喺佢心中地位好重要，佢哋上咗車都係咁傾個唔停，相信張雨綺正印地位，打風都打唔甩，唔怪得佢都懶理男友同章子怡嘅緋聞啦！