噚晚填詞人陳詠謙就喺九展舉行音樂會，邀請咗周柏豪、連詩雅、衛蘭、林二汶、林奕匡、鄭融、容祖兒同黃偉文都有嚟到，呢個音樂會除咗係陳詠謙第一個音樂會，仲係衛蘭加盟華納之後第一個音樂會。陳詠謙喺台上話有擔心過自己冇歌迷，不過有都好開心，陳詠謙除咗有唱歌之外，都有騒佢嘅琴技。

喺周柏豪唱歌嘅時候，柏豪就送咗束花畀陳詠謙，兩個又拖手又攬住唱歌，唱唱下歌又扮鍚，不過周柏豪就叫陳詠謙唔好真係鍚落去。其後陳詠謙就同師父黃偉文一齊上台，佢就講到套衫係Wyman幫佢揀，佢就笑言好似明星咁，因為有黃偉文揀。之後Wyman就講笑話：「套衫喺好遠帶番嚟，喺三里屯Uniqlo帶番嚟。」引到全場爆笑，Wyman就仲話開心，好似睇住個仔畢業咁。陳詠謙仲送咗個鬚刨畀Wyman，佢話：「個個都話你係我師父，我就覺得你似我爸爸，我希望我哋嘅關係可以幫你剃鬚咁，雖然啲朋友話似情侶。」但係Wyman就話：「冇父子係會幫爸爸剃鬚，除非個爸爸半身不遂。」又引到全場爆笑。

Wyman之後又再講笑話：「我覺得我同你咁親密，覺得你女朋友好慘，我講緊個女朋友係周柏豪，得閒叫佢斟新抱茶畀我。」台下就大叫周柏豪斟茶。

而祖兒就嚟到做觀眾，原本就全場都企，但大會就拎咗張凳畀祖兒坐，而鄭融唱歌嘅時候，祖兒都大方坐喺度聽。