正所謂「做錯要認，打要企定！」撞到人，更加唔可以走咗去！因為可能錯過搶救嘅黃金機會，令傷者眼白白等死！
小記講緊嘅係前晚8點幾喺元朗永寧村村口發生嘅致命車禍，一名48歲阿叔踩電動單車時，俾架客貨車撞倒並輾過，傷者個幾鐘後先喺現場俾人發現報警，最終傷重不治。
永寧村村民李先生提供嘅閉路電視入面，可以見到男事主俾架深色客貨車輾過，拖行兩秒後，客貨車司機扭軚，傷者先從車尾碌出黎，當時已奄奄一息，但由於夜深，附近冇人行過，個幾鐘之後先有村民發現報警，可惜經搶救後已經救唔返，而肇事嘅客貨車就不顧而去。

村長：警方拉錯人

幫手報警嘅李先生話，當時係打算去攞車，「入到村口見路中心有嚿嘢，仲以為係垃圾」。點知行近一睇，見到傷者瞓咗喺度，「嘔晒血瞓咗喺地！」警方喺案發後大約3個鐘，喺現場百幾米外嘅路邊，調查後發現懷疑涉事客貨車，以涉嫌危險駕駛導致他人死亡拉咗個55歲司機。警方會安排驗屍搵出死因。
小記之後去咗永寧村，撞到嗰位姓陳嘅涉案司機，佢當時喺一個貨倉揸緊鏟車，呢位司機大佬話，案發前兩個鐘左右就出咗去食飯，而架客貨車就一直泊喺屋外面，上周六起就冇揸過。警方喺案發後上門搵佢，話客貨車撞死人，要求佢返警署調查，「錄口供錄到凌晨4點」，佢話離開警署嗰陣唔使交保釋金，對於警方話佢涉案仲拉咗佢，覺得莫名其妙。司機大佬冇講啲咩，反而村長就好勞氣，仲話警方拉錯人。