真係唔講你唔知，原來巴西球王李華度嘅死球教練，竟然係英格蘭「萬人迷」碧咸！話說當有人問李華度佢主射罰球嘅秘訣時，佢竟然好大方咁話：「呢啲係我向英格蘭中場碧咸學習嘅成果，碧咸唔單止主射罰球厲害，佢啲交波亦都一流；我不時都會睇佢射罰球同埋交波嘅錄影帶，重係慢鏡逐格重播嗰隻，我特別會留意佢點攞個波，同埋點踢出個波。」
其實，喺李華度之前，佢嘅巴西國家隊隊友卡洛斯，亦講過自己射罰球係向碧咸偷師嘅，重大大聲聲咁話：「如果我射到碧咸咁樣嘅罰球就好囉！」咁睇嚟碧咸咪成為咗射罰球嘅一代宗師？

米路足協唔咬弦
今個禮拜係中國甲A聯賽開鑼，重頭戲係上海打吡戰，米路無理由唔去睇班愛將，但佢老人家就話自己身體重未好得晒，唔想咁頻撲，留番喺北京睇另一場聯賽好過。有消息話米路因為唔滿意中國足協嘅備戰工作編排，所以詐病唔做功課。我求大俠就希望雙方唔好意氣用事，話晒都係中國人第一次現身世界盃決賽周，輸贏唔緊要，但係因為人事問題搞到隊波，輸都輸得唔光采，到時就喊到無謂。

蘇拿保護球證抵讚
車路士前鋒蘇拿雖然喺禮拜三球隊贏富咸三比二嘅英超聯比賽冇入波，不過兩隊球迷，甚至球證鍾斯，都封咗佢做英雄。話說當車路士領先一比○時，鍾斯突然判罰「車仔」十二碼，搞到一個「車仔」球迷好㷫，衝入場找鍾斯晦氣，喺呢個時候蘇拿挺身而出，擋住嗰位球迷，叫佢乖乖返回座位，結果兩隊球迷拍爛手掌，鍾斯重話會喺報告點名稱讚蘇拿㖭！