英國《BBC》報道，意大利傳奇電單車手羅斯（Valentino Rossi）早前喺一次練習發生意外，搞到右腳脛骨同埋腓骨出現雙重骨裂，不過呢位冠軍級人馬只係唞咗18日，又已經坐返上架電單車度！

羅斯效力嘅Movistar Yamaha車隊話佢喺意大利嘅賽道鍊咗幾個圈車，試下自己嘅感覺，不過因為之後落雨，令今次練習被逼中止，車隊之後發聲明話由於練習時間太短，暫時無辦法就羅斯嘅情況作出結論。報道話羅斯會喺禮拜三決定係咪參加今個周末喺西班牙舉行嘅格蘭披治電單車大賽（MotoGP），羅斯依家喺車手榜排第4位，落後榜首嘅馬基斯（Marc Marquez）42分，MotoGP今個賽季仲有五站賽事。