日本國民組合SMAP不歡而散，五子叠埋心水各自各發展，有傳草彅剛會今年娶妻，近日亦傳出香取慎吾會跟拍拖多年女友拉拉埋天窗。 聽日出版嘅雜誌《女性Seven》，都報導44歲嘅中居正廣原來有個秘戀6年嘅同居女友，對方更係圈中人，就係現年32歲嘅靚女排舞師武田舞香。

據透露，中居同武田舞香交往已經6年，解散前一直低調保護戀情，雜誌記者發現二人已達同居關係，武田舞香近期自行出入中居所住嘅超高級住宅大廈；日前嘅周日晚，女方搭的士返回愛巢，當如常進入大堂嘅數分鐘後，中居入住單位隨即亮起燈光。武田舞香以前曾為安室奈美惠、加藤Miliyah擔任巡唱Dancer，年前更為AKB48大熱歌曲《365日的紙飛機》任排舞師，跟板野友美等私交甚篤。

《蘋果》第十二屆金話梅電影選舉（Golden Plum）又嚟喇!由今日起，請在以下網址（ http://campaign.appledaily.com/goldenplum2017 ）投票，選出心目中的爛片之霸，截止日期係4月6日，賽果將於香港電影金像獎舉行前夕（4月8日）揭曉。