特區兵荒馬亂，突有異軍殺出，潛咗水好耐嘅財政司前司長梁錦松，突然受到中央電視台祝福，愛妻小伏接受中央台專訪，除咗向全國人民滙報甜蜜生活，專訪旁白重點名講起阿松！
同時，赤松亦轉趨活躍，即將出席論壇綜論經濟局勢，同時，李國寶亦失驚無神話，阿松可以做特首！
嘩，今次峯迴路轉，莫非天意？呢兩日，大環山同斧山道泳池，紛紛出現紅蟲驚兆，食環署提交報告，聲稱喺大環山嬉水池發現蚊屍，不過康文署就否認，話並冇活嘅蟲蛹，啲紅蟲唔係喺佢管轄範圍內滋生！
咁三隻蚊屍去咗邊？竟然要出動重案組深入調查。堂堂重案幹探，要調去搵三隻蚊嘅蚊屍，呢個政府係咪黐咗線？
大班遭到恐嚇，都未出到重案組，搵蚊屍就咁識得調配資源，唔怪得赤松做財政司司長嗰陣，堅持大力削減公務員薪酬！