韓國19歲女星金裕貞孖31歲男星尹均相主演嘅JTBC新劇《先熱情的打掃吧》，上周播出嘅第8集創收視新高達3.574%，劇集未有因為聖誕佳節而停播，將於今晚如常播出第9集，而劇組亦率先公開金裕貞、尹均相嘅劇照。

上集講到因為權秘書請假，就由金裕貞擔任尹均相嘅一日秘書，經過一日嘅相對，令兩人嘅關係拉得更近，而尹均相亦睇清楚自己心意，決心向金裕貞表白，叫金裕貞留喺佢身邊，不過一直暗戀金裕貞嘅宋再臨亦向金裕貞剖白心意，展開複雜嘅三角戀。而今日公開嘅劇照可見，金裕貞及尹均相嘅關係似乎有進一步發展，兩人夜晚喺街頭並肩而行，對望後金裕貞露出怕醜嘅笑容，劇組亦透露金裕貞、尹均相於劇中進入曖昧階段，預告兩人之後有甜蜜情節。

精選韓流，喺晒《娛果》
http://fb.com/appledailyent