韓國「國民妹妹」IU近日忙於舉行十周年巡演，噚晚佢於亞博進行香港站，三個半小時嘅演出除演唱《Good Day》、《You and I》、《Twenty-three》等多首經典歌曲外，又跟擔任嘉賓嘅男歌手陳柏宇（Jason）合唱。尾聲時IU更因為粉絲嘅應援而感動到喊，場面感人。

IU換上多套靚衫露肩晒腿演出，又不時大講「飲啖水先」、「真係多謝大家」、「好幸福呀」、「我愛你」等廣東話冧港迷，更讚港迷啲韓文好好，十足韓國人咁，令佢好感動。

噚晚IU邀得韓國男歌手Sam Kim及香港嘅Jason擔任演唱會嘉賓，IU跟Sam Kim合唱《Ending Scene》及《When You Fall》。IU為跟港迷溝通而盡量講英文，對此Sam Kim大讚IU英文好，IU就謙虛地表示自己只係識講簡單嘅英文。

而Jason現身時，佢先演唱《霸氣情歌》，之後跟IU合唱韓文歌《嘮叨》。Jason坦言好緊張，話係繼十年前唱過日文歌後，第二次用自己唔熟悉嘅語言（韓文）唱歌，之後Jason再演唱新歌《後排慶功宴》。

IU於騷上不時賣口乖讚港迷，又表示其中一套造型嘅衫上寫住「香港」，更落台親近粉絲，表示是次港騷係佢於香港最好嘅演唱會。安哥時，IU換上白色長紗連身裙，十足穿婚紗一樣，又驚喜演唱《Through the Night》嘅廣東話版。當佢唱《Dear Name》時，台下全場粉絲舉起寫上自己名嘅應援橫額，令IU感動到喊，差啲唱唔到落去，最後多次鞠躬先離開。

完騷後粉絲再次大嗌安哥，換上便服嘅IU就再次現身。IU表示平時唔會於台上喊，但今次真係被粉絲嘅應援感動到，話好驚喜同難忘，仲話要收返晒台下6,000張寫上粉絲名嘅橫額，佢更落台親自收咗幾張。IU大讚諗到呢個應援嘅粉絲係天才，話好想見對方，因此再次落台行近粉絲堆，握住嗰位女粉絲嘅手多謝佢及其朋友，話呢個係佢見過最好嘅應援，搞到女粉絲都激動到狂喊。IU之後笑言：「本身打算唱多40年，0依家決定為咗大家唱多50年。」

上返台後，IU戴上聖誕頭飾預祝港迷聖誕快樂，又話：「其實真係冇咩時間，工作人員今晚（噚晚）要飛返韓國，本身冇（預計）兩度安哥，但因為收到大家嘅大禮，就再度出嚟。」IU應粉絲要求，加唱《Someday》、《Rain Drop》及《Merry Christmas In Advance》，最後承諾會盡快再來港，圓滿結束三個半小時嘅港騷。

精選韓流，喺晒《娛果》
http://fb.com/appledailyent