當年今日
關於我們

【好坦白】喺大陸先有飯食 江若琳堅決返香港:要返去最起點

蘋果日報 2017/03/31 15:52

江若琳黎瑞恩金像獎林家棟尋找快樂時代

江若琳(Elanne)、林家棟、黎瑞恩、組合Super Girls,仲有E-kids噚晚去咗理工大學賽馬會綜藝館睇音樂劇《尋找快樂時代2017》。
Elanne話原本套音樂劇之前有搵過佢,但係個期唔得,佢話:「睇吓佢哋會唔會再re-run,我o依家要講定我有期,之前我喺內地,但我今年成個重心會喺香港。因為想唱歌,我都同身邊嘅人拗咗好多次,大家問我仲要唔要食飯,但今年我出道10周年,想返去最原本嘅起點,做番歌手,有好多嘢想同大家分享。」
唔喺大陸掘金,係咪搵夠錢,可以講理想?Elanne話:「絕對唔係,我媽咪噚晚先畀壓力我,話我做咩要去實現夢想,提我好似有好多費用要交,佢眼見我推咗兩部劇、一部戲,佢好肉赤,冇咗接近7位數,又好擔心我要交嘅費用,我就話冇事嘅,下半年有好作品我就拍一部,所以佢都好矛盾,又想見我,但又擔心我。」
啱啱先同內地相星曹雲金分手嘅Elanne,講到感情:「媽咪好尊重我,佢以前會擔心,但o依家就知道個女開心重要,隨緣啦!雖然我都去到一個適當年紀,但未遇到適當嘅人,等囉,唔好夾硬為咗快啲而同唔啱嘅人一齊,咁我下半生都唔會幸福。」
至於有份喺下個月9月舉行嘅香港電影金像獎中,角逐最佳男主角嘅林家棟,佢話冇時間緊張,仲要頒獎禮前先可以返香港,佢話:「因為我過兩日要返去內地開工,之前係忙少少,仲要幫金像獎拍宣傳嘢,o依家舒服啲,執行李等出發,8號晚先返嚟,過埋頒獎禮我又要再飛,所以自己冇乜心情上嘅準備,留番嗰日先緊張啦。」
但係家棟嘅親戚朋友比佢仲緊張:「一定啦!導演都緊張,我都戥佢哋高興,其他拍擋都好支持,我都好開心,原來自己都有啲朋友嘅!但都係嗰句最重要係個party開心,唔係單單話有幾多個提名,呢套戲喺2016年係好有話題性嘅電影先係最緊要。」

《蘋果》第十二屆金話梅電影選舉(Golden Plum)又嚟喇!由今日起,請在以下網址( http://campaign.appledaily.com/goldenplum2017 )投票,選出心目中的爛片之霸,截止日期係4月6日,賽果將於香港電影金像獎舉行前夕(4月8日)揭曉。