香港著名飲食作家黃双如於中環開設的「有食緣」，開舖接近十五年，始終敵唔過「三高」：租金高、人工高同成本高，惟有忍痛結業。

黃双如面對自己經營小店結業進入倒數六日，心情同今日打扮一樣咁沉重，著上深藍黑色乾濕褸的黃双如話：「好難過，心情好唔好。最唔捨得係班員工，一班熟客同呢個地方」。

黃双如表示，店舖由2001年3月到目前，15年的變遷，估唔到有結業嘅一日：「由陸佑行到皇后戲院，再嚟到砵甸乍街，租金三級跳。消費模式改哂，宜家顧客唔似上一代咁（買嘢），變得好快......咁人工升、成本同租金又升，生意跌得好快。」她坦言，上個月生意得番原本嘅三成，小店喺香港認真難做。