家陣房屋問題全民關注,而運輸及房屋局副局長邱誠武噚日就俾傳媒發現,佢八十多歲嘅媽媽住喺荃灣福來邨,懷疑係公屋「寬敞戶」咁話。嘩!若然屬實的話,梁振英班子都應該幾頭痕喎。報道出街後,邱副局即刻去信相關傳媒澄清,話其實呢,邱母並非獨居老人,而係同另一位兒子同住。至於有傳媒質疑係咪屬於寬敞戶,由於間屋有兩個人住,面積三百五十呎左右,並冇過到兩人唔可以過三百七十七呎嘅標準。據聞邱副局其實有叫過阿媽搬出嚟住,但係老人家慣咗公屋生活,又有兒子照顧,加上邱副局個細佬資產同入息都冇超標,所以佢哋一直居於此地。喺呢個房屋短缺嘅大氣候下,公眾觀感如何,又係另一個問題。