【心臟不適】DJ梁繼璋為胞兄猝死泣不成聲：真係要好好珍惜健康同家人
蘋果日報 2020/09/21 20:47
梁繼璋心臟不適猝死
（FB截圖）
早年為香港電台主持過《瘋show快活人》和《三個寂寞的心》等受歡節目的65歲資深DJ梁繼璋，現為D100網台擔任主持，原來他大哥今日不幸在街上猝死，享年68歲。
梁繼璋今日在FB寫道：「我哥哥（梁達璋）今早獨自去打球後突然心臟不適，暈倒路上，感謝途人代為報警送院，可惜最後搶救無效，我們全部家人均有到醫院送別，特此通知Tony的好朋友，並向他的家人致以最深切的慰問。」
《蘋果》聯絡梁繼璋，他在電話中幾度泣不成聲：「哥哥今朝約咗朋友打網球，點知朋友唔知醒甩咗底，佢就自己一個人去，佢打完波之後去停車場攞車時暈低咗，如果佢同朋友去打波嘅話，起碼有個人喺身邊即刻照應......雖然有途人發現後即刻報警，但已經錯過咗搶救嘅黃金時間。哥哥心臟有事，送咗去將軍澳醫院之後，醫院即刻幫佢做通波仔手術，但已經救唔返，我同屋企人趕到去醫院時，佢已經走咗，因為疫情，我哋只能隔住玻璃同佢道別......」說話至此梁繼璋再次泣不成聲。
之後他稍為平復後說：「我哥哥有條血管塞咗，個心有時唔舒服，但佢自己冇諗到咁嚴重，諗住自己行得走得，所以冇好好處理，估唔到咁就出事。呢排因為疫情，我哋都冇見面，我對上一次見哥哥，係仲可以8個人食飯，諗住而家疫情緩和咗，一家人可以出嚟食飯見面，估唔到已經冇機會，大家真係要好好珍惜健康同家人......我覺得最遺憾，係以為可以睇返WhatsApp聽返哥哥把聲，但原來我哥哥喺WhatsApp從來冇留低半句說話，只有文字，好可惜、好遺憾。」
梁繼璋今日告之親友哥哥不幸消息。（FB截圖）
梁繼璋哥哥（右後）今日不幸心臟不適猝死，他與胞姊（前右）暫未敢告訴母親（前左）。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！