韓國天團BIGBANG雖然近日受T.O.P醜聞影響，但無損各成員嘅工作，隊長G-DRAGON（GD）將於今日如期喺首爾舉行世界巡迴演唱會首場《Act III, M.O.T.T.E》。

噚日GD方面就宣佈首場嘉賓將會係IU，IU噚日亦已經低調綵排，令唔少粉絲都好期待二人喺舞台上表演《Palette》。

另外，GD前日推出回歸專輯《權志龍》，主打歌《無題》MV截至今日上午已有逾782萬點擊，就連美國權威Billboard都激讚佢呢張專輯，指新歌《無題》表現出同以往唔同嘅低調風格，係能夠感受到私人情感嘅音樂。不過《無題》呢首歌卻被人聯想到GD嘅前女友水原希子，事關《無題》第一句歌詞就被網友指出含有水原希子嘅名字「Kiko」，加上歌曲英文名為《Untitled，2014》，2014年正正係兩人熱戀時期，但係有網民就,歌詞係「讓你回到我身邊」，正確發音為「giga」，可能因為唱歌時發音唔清楚先會產生誤會。而有網民就話歌詞暗指過去嘅戀人，又話「下輩子與你相見，也能夠與你相愛。」令人揣測GD係唔係憑歌寄意。