高踭凉鞋、小背心加超短熱褲，幾乎係今個夏天女士們嘅標準休閒打扮，長時間着住高踭鞋其實對腳都幾受罪，但啲女士就會話着慣咗就無問題，着番平底鞋反而會唔舒服。不過，大家千祈唔好睇小經年累月着高踭鞋嘅影響，隨時患上「高踭鞋綜合症」（High-HeelSyndrome），有啲嚴重嘅個案，仲因為關節長期受壓而退化要提早換人工髖關節。
最近澳洲物理治療師LizQuinn講，越嚟越多女士因為着得高踭鞋多而受傷要睇醫生，佢估計每10個女人有6個都試過因為着高踭鞋受傷，甚至有啲人會患上高踭鞋綜合症，即係由高踭鞋引發嘅腳痛同腰背痛，問題可大可小。
其中以斗零踭高踭鞋引起嘅問題就最大，因為只得個斗零踭頂起成個人，令身體承受最高嘅壓力，專家形容女士着住對斗零踭就好似叫大象用一隻腳企咁，將成身嘅力放晒係鞋踭一點度，想唔背痛到幾難。