樂隊Nowhere Boys今日去到商台宣傳新歌《生死時速》，首歌嘅內容係講拆彈，生活中有好多事情需要喺好短時間作出決定，就好似計時炸彈喺面前，要決定剪邊條顏色線一樣。為咗令件事更立體化，佢哋將派台碟包裝成計時炸彈，佢哋話:「每一個都係親手整，總共整咗百幾個，炸彈上面嘅字都係黐上去，務求做到最真，不留任何筆跡。」

鼓手Nate早前離隊到紐約進修音樂，隊友指雖然期間有其他鼓手代替，但始終都不及Nate跟大家嘅合拍性，上星期六佢哋首次喺廣州舉行賣飛音樂會，亦係Nate歸隊演出，大家更加感受到佢比以往更具爆炸力。今次演出為佢哋打咗支強心針，佢哋話:「 最初仲擔心門票銷量，到開騷時竟然多咗二百幾人，人數都唔重要，最緊要係啲人反應非常之好，我哋都未曾試過台下嘅聲音，可以蓋過我哋台上嘅聲音。」

精選娛聞，喺晒《娛果》
http://fb.com/appledailyent