韓國天團BIGBANG嘅29歲成員太陽，今日推出新碟《White Night》，當中新歌《DARLING》被指係一首傷心嘅歌，因而令人猜測太陽跟《陽光姐妹淘》女星閔孝琳分手，結束四年情。日前太陽所屬嘅YG事務所就否認「分訊」，指二人仍然甜蜜交往中。

今日下午太陽為新碟舉行記者會時，回應早前傳出嘅「分訊」，表示：「對於指《DARLING》係離別嘅歌曲，其實係錯誤嘅報道，好心痛，其實係講述激烈嘅愛情，係戀愛中嘅人會非常有同感嘅歌詞。」否認跟閔孝琳感情出現問題，更於會上放閃：「因為閔孝琳係我最愛嘅人，佢係給予我最多靈感嘅繆思。」

對於再次推出solo新碟，太陽表示：「能夠再出專輯真係好高興、好幸福，因為上次嘅《EYES，NOSE，LIPS》受到大家喜愛，今次嘅專輯大家都好期待，所以更用心地製作。比起負擔感，更多嘅係享受，今次專輯係跟新嘅製作人合作，有更多尋找我音樂色彩嘅機會。」

太陽又提到早前因吸食大麻而被判刑嘅隊友T.O.P。太陽指T.O.P係佢嘅隊友同朋友，T.O.P正經歷最難過嘅日子，認為留喺對方身邊就係最好嘅安慰，希望跟T.O.P多交談，可以幫助開解T.O.P。

另外，太陽亦忙於準備個人巡演，下月24日更將來港開騷。