香港地產界真係好多文人雅士，舞文弄墨功力都唔弱。繼「窮人恩物」、「業主求死」、「收租好過打劫」等金句後，網上瘋傳一張二手樓盤廣告，以4隻大字「袖泥跳樓」（就嚟跳樓），形容一間以338萬放售之時尚華庭建築413呎單位

雖然唔知點解個代理要玩同音字，亦唔知呢4隻字，到底係形容梗業主的焦急，定係代理生意難做冇飯開嘅心情。總之廣告成功出位，並於網上瘋傳。近來二手樓市冰封，代理於絕境下，文字功力小宇宙，睇怕有排爆發。