要數家陣中國最紅嘅IT人，非數雙馬（馬雲、馬化騰）不可，但其實聯想集團（992）創辦人柳傳志，先算係中國第一代IT教父，唔經唔覺，柳總已經71歲，雖然尚未退休，但其實佢嘅下一代早已經進入咗IT，盡得柳總真傳。
無獨有偶，最近內地兩大call車Apps，滴滴快的同Uber都先後請嚟兩位柳氏靚女任中國業務嘅高層，滴滴快的請咗柳總個乖女柳青做總裁，而Uber中國亦請嚟柳甄做Uber中國嘅戰略負責人。

柳青曾任職高盛

究竟呢個柳甄乃何許人呢？此乃柳傳志嘅姪女，同柳青屬堂姊妹關係，除咗大家都姓柳，二人都犯下「樣貌與年齡不相稱」罪名。
根據內地媒體報道，柳甄年紀同柳青差唔多，都係三十幾歲，但日前柳甄同內地媒體做訪問，其中有媒體登咗佢張相，束長馬尾，白恤衫，黑色鬆身西褲，時尚型格，望落去真係幾後生（不過要留意返，張相係被訪者提供），同柳青不遑多讓。
再講學歷，柳青北大畢業後去咗哈佛，之後去高盛當banker，柳甄就中國人民大學畢業後去美國繼續進修法律，之後留喺美國做律師，做互聯網創業公司嘅法律諮詢，其中一個客仔就係佢今日個老闆、Uber創辦人Travis Kalanick，柳甄話長遠會將Uber中國上市㖭，呢啲都係後話啦。華華有興趣係，日後兩位柳氏靚女如何響內地call車Apps大鬥法，而柳總又會用邊個App多啲呢？

李華華
mailto:[email protected]