跳舞除可減肥外，還能減壓，就如《談情共舞》中，李察基爾人到中年、事業有成、有個叫做幸福的家，但心靈始終欠缺一些東西。當他重新學舞後，人也變得快樂。導演彼得車遜用標準舞（即社交舞）帶出人生在空虛失落時，怎樣再能重現光芒，生活可繼續活得精采，唔係一定跳HipHop才可發洩人生不滿嘅。珍妮花洛庇絲一向是票房毒藥，但在此片中佢跳盡渾身解數，就算演技唔好，也值得加點分。「美國舞男」李察基爾老來回歸舞壇，仍散發瀟灑魅力，不過戲中最為出色反而係禿髮男同直腸直肚嘅肥婆，除舞技一流，還非常搞笑，充滿驚喜。

瞞住老婆學跳舞

故事大部份改編自日本製作嘅《談談情、跳跳舞》，講述律師約翰（李察基爾）的人生差不多十全十美，但總覺得若有所失。一日放工坐地鐵時，看見漂亮的Paulina（珍妮花洛庇絲）在一間舞蹈校社的窗前，約翰被她莫名地吸引後，便瞞着老婆（蘇珊莎拉頓）跑去學標準舞。當他愛上跳舞後，還準備參加比賽時，老婆以為他另結新歡，正正道出都市夫妻因工作忙碌而缺乏溝通，導致感情轉淡。DVD收錄了標準舞入門，兩公婆睇完齣戲，重可即場喺屋企偷師，增進感情，幾咁好呢！

《談情共舞》
DVD：$168
VCD：$48
發行：洲立影視（24188869）

文：盧曹珠