內地落實QDII之後，上至基金經理，下至一般尋常散戶都對這個問題好有興趣，因為內地「水源」氾濫，漏些少過來港股已可以在市場上興風作浪，所以QDII放閘之後，普羅投資者都滔滔不絕地討論大陸資金會炒乜股。
近日星俠有緣睇到大華繼顯一份報告，雖然份報告已喺半個月前發表，但由於內容係講未來12個月將受惠QDII的股份，故依然有參考價值。大華繼顯份報告認為，透過QDII將有25億美元湧向港股，相信入市目標係國企及紅籌股，其中該行品題的中信資源（1205）係星俠愛股之一，梗係要望多兩眼。

要做內地油股4哥

中信母公司銳意將中信資源打造成「國內第4大油股」，繼去年購入51%印尼油田、今年5月從母公司注入哈薩克斯坦油田50%權益，以及渤海灣冀東油田90%權益後，可謂已打下堅實基礎，預期中信資源07年至2010年石油生產年複合增長率高達40%。報告又話，中信資源06年至09年的年複合增長率達90%，每股盈利可由0.05元升至0.33元。
另外除了石油，中信資源同時亦擁有兩大錳業公司，其年產量佔內地錳儲備22%，現時錳價每噸約3萬元人民幣，換言之，中信資源受惠全球資源熱。其股價最近升越4元後，呈反覆偏強的姿態，估計後市升勢有餘未盡，首目標上望5元。