政府開放生豬市場，聲稱市民唔使捱貴豬，相信博到唔少市民掌聲，食物及衞生局局長周一嶽噚日公佈消息時，特別點名多謝民建聯幫手，民建聯以前有辱無榮，今勻終於榮辱與共，睇嚟政府要拉攏民建聯唔係得個講字。

張宇人有要求開放市場

民建聯獲點名讚自然冧晒，自由黨聽在耳裏就唔多like。飲食界代表張宇人都有份要求開放生豬市場，政府卻多謝都冇句，不過張宇人同八方講冇所謂，因為冇諗過要刻意鋪張自己政績。民建聯黃容根比較公道，話其他黨派都出過力，分啲掌聲畀自由黨。
黃容根又話周一嶽開口讚民建聯，係因為民記最早提出建議，加上身兼港區人大代表嘅副主席葉國謙又喺人大會議中提過，可能政府因為咁而記得民建聯出過力啩。有個民記黨員同八方講，中港事務始終係佢哋強項，民主黨、公民黨點搞都冇符。
高官一句多謝，張宇人睇嚟唔多志在，旅行度假真係重要過爭排名爭功勞，話之你周一嶽大細超啦，佢今日就飛日本北海道放暑假，可以品嚐日本黑豚肉。