當年今日
關於我們

中環在線:匹克翻兜J.Lin得啖笑 - 李華華

蘋果日報 2012/02/20 00:00


上個禮拜五匹克(1968)無端端彈咗成8個百仙,跑贏其他體育用品股幾條街,原因係市傳佢哋簽咗牽起全球「林瘋」(Lin-Sanity)嘅美藉華裔NBA球星林書豪!之不過,有熟悉匹克嘅分析員朋友同華華講,呢個傳聞真係流過流口水,實情係匹克幾年前走咗寶就真!
據分析員朋友講,匹克簽J.Lin堪稱為佢入行以嚟聽過最無稽嘅傳聞,公司CEO許志華係就係喺美國,但就為咗睇美國LA旗艦店開幕,再順便去紐約傾吓生意,冇約到林生見面喎。街傳到要落實簽到佢?真係十劃都冇半撇。
有人仲爆畀華華知,查實幾年前真係有人向匹克推薦過林書豪,不過匹克當時唔識貨,當然冇簽到啦。結果林書豪2010年就俾Nike簽咗,家人哋日日着緊Nike波鞋,市傳合約今年到期。「林瘋」家陣紅到咁,睇怕想Nike輕易放人都幾難吓。
不過凡事無絕對嘅,匹克貴為NBA嘅中國合作夥伴,若果要傾,點都有啲啲優勢,當然要睇埋誠意(金)啦。許志華上星期先大打開口牌,同外電大爆未來一至兩年嘅業績有壓力,希望透過大搞海外市場,增加整體銷量咁話。傳聞匹克市值單日就多咗4億銀,若果真係簽咗J.Lin,仲得了嘅?睇嚟許生就真係要認真諗吓點樣去搶林書豪返嚟喇。

李華華
mailto:[email protected]