雷神靜咗大半日,尾段終於識贏馬,第九場贏完東廐「牛精叻仔」,第十場再贏擂台躉蔡約翰之超級惡馬「魚躍鳥飛」,後發先至超越柏寶,成功起孖鎖定騎師王勝局。「魚躍鳥飛」上仗開齋贏到甩晒轆,今場初上二班照樣撳韁輕勝,擊敗亞、季軍「海鑽石」、「勝利之星」,1.5倍熱W順利開出,其表現充滿大將之風,下季隨時係中距離級際賽蔡約翰馬房爭分主力。而今場拉頭馬時甚大陣仗,林建岳阿媽余寳珠,兩位立法會議員林健鋒及盧偉國,都有到凱旋門戥兩位馬主馬景煊與關百豪高興。
神仙蔡連贏三個賽日共取四W,呢場「魚躍鳥飛」連捷,幫佢抵銷番三大追兵方、東、摩呢日較早場次各贏一場,練馬師榜Big4統統未能改變名次。雷神日前已親口認輸,指自己今季無緣奪冠,並將新目標定為首季在港策騎100W,家陣仲差12場就可以如願。