隔牆有耳:
葉劉倡拆葵涌碼頭起樓
- 李八方

蘋果日報 2017/08/22 00:00


新民黨立法會議員葉劉淑儀噚日帶住容海恩同特首林鄭月娥會面,提交施政建議。葉劉會後話同林鄭最大共識係增加土地房屋供應,除咗適度填海,亦提議將葵涌貨櫃碼頭搬到大嶼山,釋放300公頃土地作城市發展,相信建議較喺東大嶼山填海建人工島帶嚟嘅生態破壞更少,佢亦建議林鄭向中央反映,畀港人有機會參與外交部工作,並讓港人自願參加解放軍等。
因應家陣舊樓難以做買賣,銀行難做按揭,葉劉亦建議按揭證券公司推出新計劃,等置業者可以買舊樓住。佢仲話𠵱家暗標賣地,建議成交後,政府公開所有招標價格,以防因為天價中標嘅消息推高樓市。問及政府向來擔心公開標價會令中標者「唔找數」,葉劉話可以畀中標者「找數」後,政府先公佈所有招標嘅價格。