兩年一度嘅電視劇《廉政行動》又嚟喇，9月26號晚8點半，一連五個星期六喺無綫高清翡翠台播映。今次廉署同香港導演協會合作，搵嚟林超賢、葉偉民、劉國昌、邱禮濤，同埋廉署自己嘅導演章國明拍攝，仲一改以往30幾年嘅製作手法，唔再以單一真實個案作藍本，改為將幾單畸士組織成一個古仔，包括講上市公司同保險業貪污、樓宇維修、市區重建同公職人員行為失當等貪污案件。

演員陣容方面，今輯雖然冇劉松仁呢啲老戲骨幫拖，但都加入唔少新面孔，除咗最近被踢爆美國賭城結婚嘅丁師奶楊千嬅外，仲有林雪、宣萱、薛凱琪、周柏豪、許志安、黃浩然、邵美琪、林保怡、郭羨妮、鄭融，以及JJ賈曉晨等，新人、甘草共冶一爐。廉署話今輯搵偶像派演員同歌手參與，係希望可以吸引年輕觀眾，增加佢哋對貪污禍害嘅認識喎。
楊千嬅、宣萱、邵美琪同許志安會扮演總調查主任，薛凱琪、周柏豪就飾演初出茅廬嘅調查人員；林雪今次就會飾演被迫行賄嘅工程判頭。丁太楊千嬅首次參演《廉政行動》，但佢既然做過《新紮師妹》，今次都係做執法人員啫，應該難唔到佢。