孫耀威今日以慈善大使身份，喺深水埗出席慈善基金會成立典禮，佢表示雖然唔識彈豎琴，但就覺得呢款樂器好特別、好浪漫。

講到孫耀威喺11月中舉行兩場演唱會，門票亦已開售，不過欠咗好多飛債，佢話：「交俾公司同老婆處理，好多人都話要飛，好多謝大家支持。」孫耀威過往曾推出3、40張唱片，所以喺揀歌方面有啲頭痛，「我想唱國語歌，但喺香港搞，就應該唱番廣東歌，但我又想唱人哋啲歌，所以最終cut走啲自己嘅歌。」

提及為個唱瘦身，孫耀威話：「o依家瘦咗10磅，但我想再瘦10磅，想練番啲肌肉，好似李小龍咁鋼條型，因為我肥底，全家都好鍾意食甜品，所以就算o依家減咗10磅，我仲係好大個波，最高峯肥到160磅，肥到爭啲要戴bra，每屆世界盃，我又啤酒、宵夜、薯片，我好克制都肥咗2kg；4月開始減，要慢慢減，如果減得太快，我怕有情緒病，o依家入直路，減到140幾磅，我希望減到135磅。」

精選娛聞，喺晒《娛果》
http://fb.com/appledailyent