C朗經理人同巴塞代表見面？葡萄牙球星基斯坦奴朗拿度（C朗）離開皇家馬德里嘅傳聞甚囂塵上，經理人佐治文迪斯嘅角色當然舉足輕重，無論係喊走抬高身價，抑或真心鋪路走人都一定關佢事。西班牙傳媒周二就拍到文迪斯同團隊現身巴塞隆拿，同巴塞代表會面，唔會係促成C朗去巴塞呢單世紀大deal咁樣啩？

球迷們冷靜啲先，文迪斯旗下嘅球員又點只C朗一個？據報渴求右閘人才嘅巴塞，對同樣係23歲兼委任文迪斯做經理人嘅華倫西亞守將祖奧簡斯路，以及賓菲加嘅尼爾遜施美度都好有興趣，但兩位身價都唔平，盛惠2,500萬至3,000萬歐元架！亦有指過去一季表現備受批評嘅巴塞中場安祖高美斯，離隊可能性亦係今次商討議題之一。