11.25九西立法會補選過咗兩星期，贏咗嘅建制派陳凱欣似乎靜咗落嚟，睇新聞報道唔多覺佢喺議會發過言，未見點樣「突破界限」，反而有讀者同《蘋果》分享陳凱欣「突破規限」嘅事，仲要厲害到收埋警告信。嗱嗱嗱，唔係講緊佢同屋企人喺議事廳外影相受訪嗰單喎。

話說讀者畀咗張相信係選舉期間，陳凱欣同佢位拍檔民建聯鄭泳舜，仲有前立法會主席曾鈺成等人喺街上拉票嘅相，相中陳凱欣等人舉起5號手勢，仲拎住張宣傳單張。張相本身冇問題，係影嘅地方有問題，因為讀者仲提供咗一封九西補選選舉主任嘅信。

封信係咁講嘅，當局收到一位市民投訴，指陳凱欣喺11月7日朝早8點45分於港鐵九龍站圓方商場休憩平台，同鄭泳舜等人拎住選舉單張沿路叫口號，呼籲選民投畀5號，但事先未得到場地嘅管理機構書面同意。經過選舉主任調查後證明屬實，的確違反咗選舉活動指引嘅有關規定，所以選舉主任認為投訴成立，並出咗封警告信畀陳凱欣。

八方本住求真精神向陳凱欣查詢，但過咗兩日都冇回音，唔通覺得證據確鑿，連回覆都可以慳返？