一諗起百佳，除咗諗起李超人，仲有代言人黎耀祥。百佳賣盤，員工合約亦有變，百佳員工接獲管理層通知，其僱主將於下月1日起由「屈臣氏有限公司」，轉移至轄下的「百佳超級市場（香港）有限公司」，仲要求員工簽署意向書，但未見實質僱傭條款及內容，不過噚日百佳已發聲明，指員工毋須簽署新合約，聘用條件、福利及強積金等不變。

員工連老闆都換埋，咁代言人呢？係咪都換埋老闆兼改合約條款？今日祥仔喺將軍澳出席百佳活動，就話喇：「唔會，廣告合約每一年重新去簽，唔會中途有變。」

祥仔又透露，今年啱啱續新約，還笑道：「今年係合作第4年，希望嚟緊40年都係我做。」至於有否留意賣盤消息？祥仔就話喇：「我諗影響唔大，大機構有佢嘅運作，唔會因為一件事影響。」