中午飯局時份,藥王T與追數Y都唔見出現,大概忙於做生意,唔得閒嚟見班兄弟矣。藥王T甚為有心,托賓架W送來「五色靈芝」,每人一盒,全不落空。藥王T以前已送過靈芝一次,有人說靈芝能抗百病,加強免疫能力,藥王T希望各兄弟老友保持健康,於是贈送靈芝。
今時今日,健康要緊,發財其次。追數Y唔嚟食飯,自動唔要靈芝一樽,甚為蝕底。不過眾兄弟話,政府推出之十五億元貸款擔保,畀旅遊、飲食、零售、娛樂四大重災行業老闆借錢出糧,實在係幫追數Y發財。何解?政府百分百擔保銀行,銀行唔使有壞帳,但有義務代政府追數,銀行有甚麼依郁,就會叫追數公司去收數,追數Y點都有啲執吓。借錢嘅公司要九成股東簽擔保,唔還錢嘅話,追數公司就會搵擔保股東負責。簽擔保之前,唔該諗清楚。