八十七粒催淚彈催生一場持續七十九日嘅佔領行動，相信每個關心佔領運動嘅人，對當日寫住「警告催淚煙」嘅黑旗一定唔會陌生。噚日八方去到太子嘅警察體育遊樂會，居然再遇到呢面旗。
一套七款嘅機動警察Q版公仔可以喺會內禮品部搵到，包括一隻舉住「警告催淚煙」黑旗嘅旗手，單隻賣四十五蚊，全套賣三百一十五蚊，加埋個珍藏盒同紀念章就賣三百五十蚊。禮品部店員話，呢隻旗手公仔零舍受歡迎，已經賣到斷晒貨，加多十蚊仲可以買個旗套，幫支旗換唔同字句。
據了解，呢隻公仔查實佔領前已經有得賣，但遊樂會只限警員同埋家屬使用，所以冇乜人知佢嘅存在。