韓劇《經常請吃飯的漂亮姐姐》(漂亮姐姐)男星丁海寅，噚晚喺九展舉行首個香港粉絲見面會，又唱歌又玩遊戲，跟粉絲見足兩個小時。

丁海寅噚晚大晒歌喉，演唱韓劇《當你沉睡時》OST《Today I Miss You》及《你的意義》，又公開童年舊照，笑稱自己以前係頑皮小子。丁海寅於台上讀出以前嘅日記，更透露自己嘅弟弟好可愛。另外，好友秀智、「國民MC」劉在錫等人亦有拍片為丁海寅打氣。

丁海寅於見面會上亦大出冧招，除咗跟粉絲玩飛鏢、送抱、送禮物外，又應幸運粉絲嘅要求落台跟佢合照，之後又抽出粉絲跟對方視像通話，大送驚喜。

首次來港舉行見面會嘅丁海寅，透露鍾意食菠蘿包，永遠會記住見面會呢個時間，又承諾：「希望盡快再嚟香港，而且會做好啲演技。」

另外，丁海寅見到粉絲為佢準備嘅短片時，表示非常感動，最後讀信再次感謝粉絲支持，而且更全場大合照留念。

完成見面會後，丁海寅就去食飯慶功，當佢見到粉絲時都有不停揮手，又收下禮物，非常親民。

更多韓流，喺晒《娛果》
http://fb.com/appledailyent