玄學家李居明將會主持賀年節目《李居明金生水起羊年騷》，節目會於大年初一及年初二喺dbc數碼電台及now觀星台播映。今日喺尖沙咀舉行記者會，出席者包括李居明、nowTV高層何麗全、梁思浩、戚黛黛等等。

活動中，佢哋玩開運麻雀，李居明叫梁思浩心諗一件事，然後抽一隻麻雀，點知思浩抽到「七萬」，原來思浩係諗「特首梁振英係點」，李居明話：「七萬代表退運。」接著再為特首女梁齊昕同亞視抽，思浩先後抽到「發」財，思浩即刻話：「嘩，nowTV快啲簽佢，紅硬。」坐喺席上嘅何麗全表示：「傾緊。」思浩話：「何生真係洞悉天機。」李居明話：「齊昕小姐抽到發財，代表當時得令，可以全力進攻娛樂圈。至於亞視好運行，三月應該有運行。」思浩笑住話：「佢有運行，因為佢死咁耐都死唔去，翻生梗係有運行啦。」李居明繼續講：「個運同齊昕小姐一齊，齊昕同亞視已經攬埋一齊，齊昕掂就亞視掂，香港最熱嘅人物，兩件事，竟然係同生同死。」

事後訪問，講到流感肆虐，李居明表示三月八日後先係流感高峯期，佢話：「逢羊年，我哋都好驚，古代已經話羊年多瘟疫，三月八日至四月八日係高峯，一到四月八日就收晒，冇事。」問到梁齊昕係咪成功入行﹖李居明話：「剛才抽就冇作假，第一佢會搵到錢，第二有一定吸引力，所以係吉卦，會成功。」梁齊昕會唔會被爸爸阻礙事業發展﹖李居明話：「梁振英屬金，火代表佢女兒，佢女兒會坐長佢嘅正官星，如果依家齊昕出嚟係好評，代表梁振英民望會升，官運亨通，如果齊昕出嚟嘅口牌唔好，就污染咗梁振英連任嘅仕途，所以齊昕出場係梁振英嘅官星測試。今年又係火年，代表佢女兒，所以產生咗佢女兒出閘嘅現象，五、六月就係齊昕知名度最TOP嘅時候。」

講到為梁振英抽到代表退運嘅「七萬」，思浩話：「退未必唔係一件好事，叫佢反省下，人有高有低，暫時佢係退緊運。」對於為梁齊昕抽到「發」財，思浩話：「佢未拍電影已經霸晒所有版位，大家對佢有種新鮮感同好奇，大家都想睇佢做戲好唔好，除咗做CY女外，做演員又得唔得呢！其實佢拍唔拍到都贏咗啦，佢已經攞晒頭彩，就算佢話唔拍都已經攞晒。」