民主派在11.25九西補選後鞠躬致歉，但社民連梁國雄（長毛）在補選後被指「X票」，指斥選民將選票「射落海」，民主派也有聲音擔心他未能爭取本土派支持，若在新東補選出戰會落敗，但青年新政梁頌恆認為按政治倫理，即使政見不同、亦應支持長毛奪回議席，又力撐長毛至少以身作則「講得出做得到」，「佢做到嘅同立場一唔一樣？固之然有唔同，但選舉（補選）唔係正常選舉，佢係應該要攞返佢嗰席」。

長毛早前不點名批評「焦土派」，以貨架上的貨物比喻政客，反指選民任暴政繼續在歪曲政治制度下取勝，是政治自殺，引起不少民主派支持者反感。梁頌恆認為，倫理上應支持長毛重奪原屬他自己的一席，又相信長毛是在「唔係喺好好嘅情緒下」講出這番說話，但認為要爭取跨光譜選民支持，應謹言慎行，避免增添麻煩。

11.25九西補選李卓人被指未能爭取中產支持，外界一度質疑民主派是否要以新面孔出戰，長毛也做議員多年，下次若戰補選料面對同樣問題，但梁頌恆對長毛說到也做到的行事作風表示欣賞，「長毛喺議會向來都係走得比較前一群，起碼我諗過往咁多次（選舉），對呢件事（即言行一致）畀咗好大credit長毛，所以佢做過票王，2016年亦當選」，他又指民主派不能每次都找新人應戰，應思考舊人如何不會繼續負分。

香港眾志主席林朗彥亦對長毛有正面評價，「抗爭經歷同視野無人質疑」，但認為對方應留心選民對政治看法有很大分野，「（社會）運動受過創傷，情感都唔一樣，對長毛嚟講係好大挑戰」，又認為在政策主張上，長毛與新東選民過往展現的取態相乎，重點在於長毛能否與不同光譜選民溝通。

記者 梁穎妍