「因乜差事跳跳跳？」近日網上廣傳一條執勤中嘅交通警員在土瓜灣東九龍走廊叉腰兼「紮紮跳」嘅車cam片段，片段顯示事發喺6月4日（星期一），當時位置喺東九龍走廊近啟德隧道往觀塘入口，一部私家車停喺路邊，一位交通警員則截停兩條行車線駛至嘅車輛，似乎為該私家車開路。慢線駛至嘅車及時停定，快線一輛客貨車亦收慢停車，但喺個時候交通警員突然向後彈跳兩步再一個轉身，企定後一臉無奈叉晒腰，原來尾隨客貨車嘅的士疑收掣不及撞客貨車車尾。

交通警停咗片刻，首先指揮喺路邊嗰架私家車駛走。當大家討論緊交通警為乜要截停啲車，同埋的士係唔係跟車太貼嘅時候，涉事的士司機將佢嘅車cam片段放上網，睇真啲，的士衝向前面客貨車之前曾經「chok」咗一下，原來的士都係受害人，懷疑佢後面一架藍色私家車先至係始作俑者，收掣不及撞前車造成三車串燒。

在場嗰位交通警雖然無奈都要善後，佢指示的士乘客同司機落車企埋一邊協助調查，增援的警員亦到場處理車禍，現場交通一度受阻。

警方事後答返《蘋果》，佢哋話星期一(4日)下晝大約2時，交通總部一名警員喺東九龍走廊往觀塘方向近啟德隧道入口附近指揮交通，協助一輛私家車返回隧道入口，期間一輛駛至的輕型貨車依警員指示停車，尾隨的一輛的士及另一輛私家車懷疑收掣不及導致三車相撞。喺意外入面，一名35歲嘅的士男乘客不適，清醒送往伊利沙伯醫院治理，西九龍總區交通部就跟進調查緊呢單交通意外。

你敢爆，我敢獎！ 即Call《蘋果》24小時爆相爆片熱線 ：63836568