江若琳（Elanne）同蕭潤邦（Oscar）今日喺紅磡拉埋天窗，到咗傍晚一對新人接受訪問，新郎哥就打住個黑色大煲呔現身，新娘就有頭紗、短裙拖尾婚紗，兩個影合照嘅時候，大晒婚戒，之後仲有錫錫，錫足三次，一次面兩次嘴，最後一次仲咀足廿秒，江若琳咀完之後仲話有啲暈。

訪問嘅時候，佢哋就話多謝大家，講到Oscar終於抱得美人歸，佢就話：「好難啊，我要扮女人，扮美少女戰士，原本叫佢哋唔好放上網，但阻止唔到，今晚啲賓客嚟都應該會笑我，呢啲相喺兄弟group流傳。」江若琳即話：「可能做大相啊！」 Oscar就話：「英名一朝喪，啲兄弟好幫手，一啲都冇幫過我，剩係跳舞幫下手，就連愛的宣言都冇準備。」問到咁最後講咗咩好冧嘅說話，佢就話：「識咗十一年，我覺得好有緣份，大家經過好多嘢，我又離開咗呢一行，好似一個圓圈咁再見番，其實我啱啱出道嗰時，我已經覺得佢好靚。」

講到喺IG見到Oscar接新娘嘅時候，拎住一大疊金牛，佢就話：「派晒喇，都唔夠。」江若琳就話：「大家開咗個盤口，睇下邊個喊先，最後佢喊先，所以要找數。」Oscar就話：「佢哋都唔係為咗錢，好快就開門畀我入去，大家都係想醜化我。」佢仲講到最難就係扮美少女戰士，因為佢個嘴好細，但要戴一個好大嘅牙箍，所以個唇爆咗，仲要跳埋江若琳嘅歌，不過Oscar就話一向跳開呢首歌，因為好鍾意呢首歌，仲成日睇呢個MV。江若琳即話：「講埋啲反話。」

至於兩人晚上婚宴嘅會場就悉心佈置，好有格調咁展出佢哋嘅多張婚照，除咗有喺雪地影婚紗相，亦都有着住Oscar愛隊曼聯嘅波衫影婚紗相，乘機幫曼聯沖喜。而Elanne今晚所戴嘅鑽飾亦相當名貴，淨係計皇冠頭飾都價值過百萬元，而一對新人訂造嘅結婚戒指重2卡，價值105萬元，其他鑽飾加埋約10萬。

精選娛聞，喺晒《娛果》
http://fb.com/appledailyen