李八方online︱《願榮光》團隊推日文新歌 籲堅定意志迎接《明日》
李八方online願榮光抗暴之戰
令人難忘嘅2020年,大家唔經唔覺已經捱過咗大半。下一年會點呢?未來又會係點呢?
舊年為我哋帶嚟《願榮光歸香港》嘅DGXMUSIC,今日下晝4點將會發佈佢哋嘅新歌《明日》,唔再係進行曲,亦唔係廣東歌,而係用日文去演繹一段屬於每一個香港人嘅日常故事。喺MV入面,兩個嘻嘻哈哈嘅中學雞,遇上心事重重嘅大姐姐,透過街頭巷尾留低嘅文字塗鴉,慢慢理解呢一身黑衫背後嘅意義,一齊期待一個更加好嘅《明日》。
今次呢首歌繼續係DGXMUSIC嘅大腦Thomas作曲,由住咗喺香港十幾年嘅日本人「國際巨星」(化名)填詞,並由日文好標準嘅香港人唱出嚟,唔講嘅話絕對覺得係一首源自日本嘅流行歌。
Thomas話,今次呢個製作自6月起喺民間開始醞釀,話比起台灣、歐美等嘅地方,日本對香港關注程度好像唔算特別高,於是有人建議不如搵DGXMUSIC作返首日文歌,再配上一個能傳達到香港人心聲嘅MV,希望令本來唔太了解香港時局嘅日本人,都可以從日常嘅角度去理解,同時支持香港爭取民主自由;英語版及其他語言版本亦正在製作當中。
成個project用兩個星期時間就眾籌咗15萬,搵咗好多專業嘅朋友參與,好似MV咁就由香港資深電影人負責,但其間經歷唔少困難,好似一位喺日本頗有名氣嘅香港政治人物就被迫退出參演。二人導演團隊5201314(化名)話,呢個MV係希望將香港人過去嘅內在心情表達出嚟,特別係年輕一代人面對未知嘅將來以及高壓管治,世界各地嘅朋友必須連結起嚟,用純潔同堅定嘅意志去迎接新世界來臨。
-----------------------------
-----------------------------