鄭秀文（Sammi）前晚假馬來西亞雲頂舉行首站巡唱，事隔4年再於當地開騷，觀眾叫到拆天，Sammi興奮話：「好耐冇見，我個樣有冇變呀？」觀眾大嗌：「冇。」Sammi笑言：「我食咗防腐劑呀，哈哈！今晚好多舊同學嚟咗，佢哋成日俾我蝦，但我哋友情不變。」

為咗比觀眾新鮮感，Sammi換咗部份新戰衣登場，其中一襲白色晚裝襯巨型羽毛頭型格十足。當介紹嘉賓組合CAllStar成員安仔出場時，觀眾趁機大叫「安仔」，Sammi甜笑說：「我同呢個名真係好有緣。」而唱完《玻璃鞋》後，Sammi又話：「當年拍《嫁個有錢人》時，我都想嫁個有錢人，但係有錢係冇用嘅，真愛無敵！」