三甲剛選出，無綫即拉埋眾佳麗大談得獎感受。冠軍17號陳凱琳表示大家份屬好友，故揭曉一刻份外感動:「邊一個贏我哋都好開心，有呢個結果我真係想像唔到，仲喘緊氣咁。」至於得亞軍、同屬大熱嘅蔡思貝就表示:「宣佈嗰刻，我同自己講，行到呢步，我已經好滿足。邊個攞邊個名銜都好開心。」季軍6號劉佩玥眼淺得當場哭了，方才佢話:「成個過程都好快，Grace攞冠軍因為佢真係表現得好好，而我就比較緊張，情緒比較波動。」

問到當選後第一時間想做乜？冠軍17號陳凱琳謂:「我爹哋媽咪係觀眾之一，我真係好想攬住我爹哋媽咪，因為佢哋一直好支持好支持我，仲喺加拿大陪我返嚟，所以我真係好想好想攬住我爹哋媽咪。」亞軍15號蔡思貝就表示:「其實我呢一刻最想爹哋媽咪見到我呢兩個月嚟邊度生活(指電視城)，睇到我喺邊度努力。」季軍6號劉佩玥就話唔敢請父母到場，擔心令自己壓力太大。

陳凱琳又表示，覺得自己答問題時最優秀，因為自己鍾意講嘢，又有司儀經驗。蔡思貝被問到覺得自己輸乜嘢，佢就話:「做港姐要代表香港，可能我講嘢有少少咬字唔清楚，表達能力冇Grace咁好。」季軍劉佩玥就話覺得因為Grace今晚表現真係太好。之後無綫再請來三甲佳麗嘅家人上節目，講到肉緊之時陳凱琳率先企起身轉身攬住雙親，之後蔡思貝同劉佩玥都一齊企起身，分別同身後嘅家人攬攬，蔚為奇觀。唯獨係13號友誼小姐歐陽巧瑩未有家人上來，慘變孤獨精好尷尬。