當年今日
關於我們

【生死邊緣】大囡6個月做開腦手術!詹秉熙:唔救就冇

蘋果日報 2017/06/14 00:02

詹秉熙詹紫茵詹莤茵

【新增影片】
詹秉熙兩個囡囡,20歲大女詹莤茵同15歲細女詹紫茵,已經長得亭亭玉立,同一般女孩子無異。但邊個會諗到,詹秉熙大女喺出世6個月時,因腦出血而要做一次開腦手術,一度徘徊生死邊緣。
詹秉熙憶述當時情況,雖然係20年前嘅事,但當晚記憶,依然歷歷在目:「當時唔知係咪工人姐姐睇唔實跌親佢,總之嗰晚阿女係咁抽筋,我同老婆即刻抱佢去浸會醫院,第一次做老竇乜都唔識,開頭以為好少事,點知一照X光,發現有成支益力多咁大範圍嘅瘀血,壓住佢個腦,醫生話要即刻開腦放瘀血,唔救就冇,嗰時搵咗個東京大學嘅開腦教授嚟做手術,你都唔理得平定貴,都要做,最終我記得埋單係10幾萬。」
屋漏兼逢夜雨,詹秉熙話當時係臨近新年,自己又冇工開冇收入,年關難過,問佢既然有經濟壓力,點解仲要去私家醫院。佢就話:「去到醫院諗住睇症,點知要即刻做手術,仲點搬佢過其他醫院,唔通你仲排隊睇醫生等做手術咩!嗰時直情想死,係我想死呀!不過阿女都醒呀,我半夜偷入去醫院睇佢嗰陣,見佢俾醫生紮住個頭,自己識坐喺度挨住個枕頭瞓,6個月大咋,可能佢壓住個傷口覺得痛,所以識自己坐喺度啦!」
慶幸大女最終手術成功。莤茵讀完書後,現時受聘喺航空公司做地勤,詹秉熙笑言:「有時我會諗,佢當時唔知輸咗咩人嘅血,搞到個人癲癲得得。」雖然口講要做嚴父,但詹秉熙亦忍唔住讚吓兩個女。「佢哋兩個都算乖,冇乜反叛期,大女出街去邊同邊個去,都會同我哋講,細女直情唔願出街o忝,因為佢唔捨得屋企4隻狗。」
empty
(攝影﹕沈健程)
empty
大女莤茵6個月大時,曾做開腦手術,詹秉熙話當時直情想死。(資料圖片)
empty
(資料圖片)
empty
慶幸莤最終大步檻過。(資料圖片)
empty
(資料圖片)
empty
empty
大女、二女已長得亭亭玉立。
empty