因明晚（5日）跑九場，所以今期馬簿比較厚，字亦都比較多，而我都難得用得佢好盡吓。一如平常咁睇吓馬嘅嘢，仲好認真刨騎師資料，到時應該唔會有「面盲症」發作啦，我有時仲係會撈亂史卓豐同祈普敦。

回暖嘅天氣，加埋型男隊伍殺入跑馬地，呢九場夜馬即時升溫。雖然今回「鮮肉」並唔多，但係我深信，佢地嘅表現一定會係「滷肉級」。我估我對眼睛應該夠去一趟旅行，希望「聯合國」到此一遊，會有大滿足帶畀我哋睇人睇馬嘅團友。

全晚正題係欣賞佢哋，馬就係咁意睇吓兩隻排二檔兼有鮮肉拍檔嘅「大運舞台」加「你知我意」。第二場五班1200米，「大運舞台」季內醒目，五仗全收獎金。今次唔使刻意估個步速係點，黃俊應該唔會埋欄，將此駒守中間生位，搵機會湧上去爆一段。

第三場四班1200米，「你知我意」轉丁廐後仲有貨賣，繼續留守四班等機會，今場仲有東東減五磅優惠，有機會收復前失。放煙火嗰part最好就關我事啦！如果到時唔係純粹贈興，係賀一賀我又有些少收益，咁就不得了啦！